المحسوبية...
انا رقية وحدة من ناس هاد لبلاد عشت انا وراجلي ووليداتي بتلاتة في حالنا كافحنا باش يقراووليداتنا وعمرنا ما مدينا يدينا لشي حد ولكن الكمال لله فواحد النهار كنت راكبة انا وراجلي فالموطور راجعين للداروهي تخبطنا واحد الطوموبيل انا اللي جات فيا الدقة هزوني للسبيطار وكالو خصني الدم راجلي مسكين تطوع باش يعطيه ليا ملي دارو ليه التحليل لقاوه هوبنفسوخاصوالدياليز اوا هاد لكسيدة خرجت لينا بجوج ديال المصايب انا تهرست في رجليا ووليت عرجا وراجلي مسكين خصو يغسل لكلاوي كل سيمانة جوج مرات يا ربي هادشي فين كان مخبي لينا ولكن الامر لله من قبل ومن بعد..صبرنا وولفنا حالنا واحد النهار وانا مع راجلي فالسبيطار تزاد عليا الحال بقيت فواحد لاسيستونت سوسيال كتبت ليا برا لواحدالرئيس ديال قسم العظام مشيت لعندو عطيتو الوريقة حلها طل عليها وكال ليا سيري الالة ما عندناش هنا هادالشي ..اش ناهو بعدا هادشي بزز باش عاودت وصلت عند السيدة وكلت ليها راه الطبيب كاليا راه ماكاينش هادشي عندنا ..السيدة حرة ما كانتش من العاكزين هزت التلفون وماعرفت اش بقات كتغوت معاه بالفرانساوية ما جات فين تحط التلفون حتى جات واحد الممرضة دافعة كرسي وكالت ليا بركي الالة انا غانديك للسيرفيس..ملي وصلنا عند الطبيب كاليا مرحبا الالة سمحي ليا انا راه ماقريتش البرا كاع الله يحسن لعوان بنادم ولا عقلو طايركاعما كنتي تمشي عندهاديك السيدة كاع كون غيررجعتي عندي...كلت ليه في خاطري ياك امولاي اوا الله ينعل اللي ما يحشم.. ودوزليا وعطاني الدوا ديك الساعة وكتب ليا طريطما وكال ليا من بعد شهر غادي يدير ليا عمليا ونرجع نمشي عادي..اوا الحمد لله..ولكن انا اللي قهرني فهاد البلاد انك خصك لابد تجيب برية من عند شي حد باش تدوز عند الطبيب وتجيب بريا باش تاخد ورقة فالعمالة وشي حد يضرب لشي حد التلفون باش تقضي انتا مصلحة تكول بحال الى تكون ماشي من هاد لبلاد الله يستر وصافي ويهدي هادالناس اللي كيعاملونا بحال الى راحنا برانيين ولا راه احنا ماشي من حقنا نكونو مواطنين فهاد الارض السعيدة.....
الاشتراك في:
تعليقات الرسالة (Atom)
ليست هناك تعليقات:
إرسال تعليق