حرفة امك بزز منك...
ملي عقلت على راسي وانا في هاذ الحرفة السلعة دتيطوان.. ايه انا كانجيب السلعة من تما وكانبيعها في الديور وحتى لشي محلات في زنقة الشمال .. كاراج علال ..شكون ما يعرفهاش اا..نسيت نعرفكم على راسي انا زكية بنت رحمة القابلة.. امي ما كانتش عاقابلة حيث هاذ الحرفة ديال القابلة كانت معطياها من امها ولكن ما كانتش كافياها و كانت كتنقي الزرع في الرحبة ديال الحبوس وملي تزاد خويا عبد العالي عيات من التنقية وبدات كاتمشي معا جارتنا طامو لتيطوان وكاتجيب الثواب الصابون الريحة الفرماج الكاشير السبرديلات اي حاجة داخلة من سبانيا ورخيصة كتشريها وكاتكلب فيها البيع هنا ..وانا من نهار عقلت على راسي وانا كانمشي معاها شربت الحرفة ..وتعلمت منين ندوز وكي ندوزالسلعة بلا ما نحصل عند الجدارمية امي مسكينة واحد المرة مشات ليها كثر من مليون ديال السنتيم الزغبية جابت طباسل ديال الطوس وحصلوها الجادارمية وجمعو ليها حب وتبن ميمتي مسكينة كانت غادا تتسطا من تما ما بقاتش كاتمشي بزاف لتيطوان ..ما سولتونيش اش دفعنا نخدمو هادالخدمة.. هههههههه.. ايه هوا هاذاك الفقر الكافر بالله الواليد تجوج على الواليدة ملي كنا صغار وملي ولدات خويا عبد العالي طلقها وكرا لينا بيت في درب السلطان امي مسكينة تعافرت معانا ولكن الله غالب كانت كاتتمنا نكمل قرايتي ونولي طبيبة بحال مدام سيزان اللي كانت في سبيطار الرهيبات.. بعدا امي مسكينة كانت كاتسحابها طبيبة هي راها غير ممرضة ..والحق بيني وبينكم انا كنت باغا نولي استاذة باش تانا نضرب الدراري كيما كانت الاستاذة السعدية دايرة كانت قاتلاني عاعصا بسبب وبلا سبب حقة ما حقة في اخر العام كالوليا راها كانت كاتتوحم..هي توحم وانا ناكل هرماكة كرهتني في القراية واللي يجي منها ملي كمل العام عمرني ما بقيت عتبتها في المدرسة جلست كابلت الشقا وخويا.. امي تخرج تبيع وانا مكابلة الدار وحتى ملي امي كاتسافر نهار الجمعة بالليل وتبقا السبت ونهار الحد ..وملي بركات وليت انا كانمشي نجيب السلعة وندور بيها مابقيتش كانشقا بزاف ...خرجت للشقا لكبير الكيران الجدارمية القطارتقل السلعة بسالة البياعة فتيطوان وحكرة البياعة في زنقة الشمال ولكن ما عندي ما ندير هادي هي الحياة حسن من شي وكرف من شي ..الحمد لله..
الاشتراك في:
تعليقات الرسالة (Atom)
ليست هناك تعليقات:
إرسال تعليق