اشارة مرور...

اشارة مرور...


الضو حمر شعل خاصني نزرب قبل ما تولي خضرا هاد النهار الحركة عيانة الشتا صابة ومحايني محاين معا هاد البواطات ديال كلينيكس..واخا الشتا تا واحد ما باغي يشري باش يمسح نيوفو..هاهاهاها..وعلاشيشريو من عند وحدة كتظل تدور بين الطوموبيلات..والله ايلا عييت من هاد العيشة ..في لعروبية واخا كان قاهرني السكيان والحطب واخا هاكاك كنت ملي نكمل نكعد حدى لكانون نتسنى امي تطيب الخبز وتعطيني شوية واخا غالخبز بوحدو قلبي كان دافي..اما دابا ساكنة معا سبعة لبنات بعد يجي الليل تلقانا مجبدين كي السرديل..بيت مافيه لا ناموسية ولا والو ..حصيرة ديال الميكة وكلا جايبة غطاها ولا لعبانتها تتغطى بنصها وتتفرش نصها وحوايجها الى عندها شي حوايج معلقين في الحيط كي السبوب...اه الهم الى قوى كيضحك..هادي ربع شهر باشجيت لهاد لمدينة الله يعطينا باراكتها وما عرفت فين غادا توصلني..البيع ديال كلينيكس جا عاكيهكاك ما عليا ما بيا لقيت واحد لمرا كبيرة قالت..لا نعاود ليكم من الاول كيشتي انا جيت من لعروبية معا واحد لمراجات عندنا للدوار كتقلب على خدامة صغيرة ..بعد اتافقت معا امي جابتني لعدها فالاول كالت ليا غاتكوني بحال بنتي وغانعلمك ونقريك داز شهر ماشت منها لا تعلام ولا قراية عاالضرب والقرص واحد النهار حمات السفود حتى حماتو وجات بغات تكويني دفعتها كيما كاندفع الدلو باش يرجع للبير وهربت بغات تتعلم لحجامة فروس ليتاما انا ماشي يتيمة انا عامعديش لفلوس وهادي لمدينة اللي جاليها ياكل خاصو عايعرف كيدير هاكا كانت كتكول ليا عمتي ..خرجت من عند هاديك لمسطيا وبقيت نجري نجري نجري..حتى كان غايوقف ليا القلب اش غاكوليكم راه واقيلا جريت شي ساعة ولا اكثر وصلت لواحد الجريدة في الرونبوان اللي حدى البياضة وكلست ما بقا بان ليا والو واحد الشوية وهي تجي امي حليمة واحد لمرا..هاديك لمرا لكبيرة اللي كلت ليكم قبيلة بقيت فيها جابت ليا لما وعاودت ليها اش جرا
كالت ليا بغيتي نديك للبوليس ..كلت ليها لا بغيت نخدم حيث خصني ندي شوية ديال لفلوس للعروبية ..كالت ليا انا كانبيع كلينيكس في الضو لحمر الى بغيتي نعاونك وكد ما خدمتي كدما تربحي ..كلت ليها راه ما عندي فلوس مسكينة عطاتني عشر بواطات وكالت ليا ملي يشعل الضولحمر نجري نطرد رزقي بين الطوموبيلات وهاكاك كان بعت السليعة ورجعت ليها ثمن اش عطاتني ومشيت معاها لدرب عمر شرينا سلعة اخرى وداتني للفندق ومشات بحالها وهاكاك كان كل نهار نجي لهاد لبلاصة الناس ولاو عارفيني شي نبقا فيه وشي يكول الله يستر وشي يعيرني وشي يسد شرجم طوموبيلتو ولكن انا اش غاندير خاصني نكمل فلوس نعيجة ولا جوج ونشري ماكينة ديال لخياطة كيشتي انا راه دخلت للمركز ديال التعلام وتعلمت ندور الماكينة المركز ديال واحد الجمعية عادازت اللجنة اللي كاتشوف واش الخدمة غادا مزيان وهو يتسد ما عرفنا علاش تا المديرة كالو لينا راها مشات تحل مركز اخر في قرية اخرى اوا تبعوها...المهم اللي دار شي يتحاسب بيه على الله نقدر نشري المكينة والله تانبرع امي واخواتاتي..عييت نحلم ولكن ربي كبير وغادا ندير داكشي اللي في بالي راه جمعت حصيصة عند مول الحانوت اللي كدام الفندق واحد الراجل الله يعمرها دار على الله اودي عانقاضي هاد الشتا ونخدم واحد الشهر اخر ونشري لماكينة ونهز رحيلي ونرجع لعروبيتنا والله الا تحشت كرمت جدي البشير وتوحشت لعدال والطورني والبير والحطب والفران ديال امي ..يا ربي تعاوني وتصبرني ..ها الضو ولا حمر نوض نترزق على راسي ..خودي اختي كلينيكسراه الشتا هادي..
بشحال..
عشرة الدراهم..
عابميا وتمانين ريال..
كان شحال هادي بهاداك الثمن..
هاكي الالة هاطناشر درهم نتعاونو معاك ما كاين باس..
الله يرحم والديك الالة..
الله يجيب التيسير..
خود اخويا كلينيكس..
لا كا بغيتش..
نجري لهاديك الطوموبيل كنعرف مولاها كيدوز من هنا ديما وهادي ربع ايام باش شرا بواطة ديال كلينيكس من عندي كراها تسالات ليه ..
خويا كلينيكس..
باقي فيها..
اجي اري وحدة نتعاونو معاك..
الله يخلي ليك وليداتك..
امين هاكي هارزقك..
الله يرحم الوالدين..
الاطيف هاد الضو تكول باغيها فيا يشعل بالزربة الله يجعل السلامة نمشي نكلس بينما تبدل عاوتاني ..ودابا راكم عرفتو كلشي الله يعاونكم سيرو شوفوغيري وهاه الى دزتو من حدى البياضة غاتلقاو واحد الدرية وجهها احمر قاتلاها الشمش ودايرة زيف اصفر ولابسة جلابة فانيدية راها هي انا تعاونو معايا الله يرحم الوالدين...