القرعة...
ما نعاودش ليكم جاتني القرعة..لا ما شي القرعة ديال دارة..قرعة الميريكان..ايه الميريكان..بلحق هاه كلامنا يبقا هنا..راه الى مشات حتا مرات ابا ساقت لخبار غاتكحال عليا..ماغاتعرف تا حاجة حتى لليلة اللي نبغي نسافر..على انا باقا نعاود..هادي خمس سنين مشيت للسيبير وعمرت وراق القرعة وتانا فرحانة وسعدانة مشيت كلتها ليها ..ساعة فضحتني مشات للحمام وطلقت اشاعة انني جاتني القرعة..اوا اخيتي اشمنك يا كادوات اش منك ياعراضات مرت ابا تبرعت مزيان هاديك ليام ..اللي عندها شي مجحوم مشومر وعندها جوج فرانك جايا باغا تجوجو..انا كنت باغيا جارتنا تجيب ولدها المحامي هواللي عزيز عليا ولكن هاذاك محامي اش باغي بشي قرعة ولا بشي ميريكان كانسمع المحاميين كيخدمو بالدقة علنيف مرفحين وانا عامسكينة ..لواه مالي تامسكينة ابا عندو حمام وقهوة وجوج حوانت ديال الجزارة ..واشتي المحامي وامو راه احنا اللي كاريين ليهم يعني ابا عندوتا هاد العمارة وعندنا فلعروبية فيرمة ..ديما نبغي نمشي ليها ولكن هاديك اللفعة ديال مرت ابا ما كتبغيش..شوفو ما نديو عاشبر عداكوتسمعومرت ابا تسحابوها دايراليا بحال ساندريلا لالا لمرا ضريفة معايا وهي اللي رباتني و ما هياش غريبة راها صاحبة امي ومسكينة ما كاتولدش عاما هي شي شوية مكلخة مكتفهمش بوجادية..وسيرو وصلو ليها الهضرة..ما علينا..انا راه قريت حتى للرابعة..وملي طلعت للخامسة بان ليا زادونا المواد وانا ما يعجبني حال وبركت بحالي بالحق والله الى ندمت كون كملت لقراية كوراني وليت محامية بحال الموحامي ولد جارتنا وكوراه غايموت عليا دابا..فينما نتلاقاه في الدروج يخنزر فيا ويحدرراسو ويدخل لدارهم بحال الا تكول ما حاملنيش..بالحق هانا غانمشي للميريكان وبحال والو نلقى شي موحامي تما.. معرفت مالي تبرانشيت على هاد المحامي تكول الدنيا فيها غالموحاميين المهم على الله غانمشي..غدا غاديا نمشي للقنصلية للاستجواب.
اه..اه..اه تكول كاع المغرب جاتو القرعة وغادي للميريكان دخلت لواحد البيرولقيت واحد الزعرة وواحد المغربي قتلوني تسوال هي تكول بالميريكانية وهويترجم ليا العالم الله مسخوط الوالدين اش كاليها في الاخر..كاليا الله يجيب التيسير العام الجاي واقيلا راه حيت ما عندكش اللغة ديالهم ..الله يا ربي الله مالي على هاد الصكوعية خرجت من القنصلية والعقل غايخرج ليا..مشيت على رجليا حتى وصلت للداروعند الباب تلاقيت بالمحامي ما عرفت منين طاح عليا الضيم وبركت نبكي المحامي حط شكارتو فلرض ووقفني..
مالك ..
ماماليش..
اوا كاتبكي عياقة..
لا ما كاين والو..
مخاصمة معا مرت اباك..
لا مالها بوعو..
اوا مالك تبسل عليك شي واحد..
تاواحد ما يقدر..
اوا مالك..
ماماليش كلتلك.. بسلامة..
اجي لهنا غاطلعي باكية هاكا ..
وانتا مالك..
مالك قبيحة..
نكون قبيحة ولا ضريفة انتا مالك..
ماماليش..اجي ياكما هادا شي راجل..
سير بحالك تانكون مصطية عاد نبكي على راجل ..
وعلاش كاتبكي..
القرعة ديال الميريكان مشات ليا حيت ما كانعرفش النكليزية..
ياك.. كنتي غاتسلتي للميريكان وتخليني..
علاه مالي انا امك..
ماشي امي ولكن شي حاجة اخرى وزيدون النكليزية راها ساهلة دابا نعلمها لك..
الى تعلمت النكليزية غانولي موحامية ..
لا الا تعلمتيها غاتولي مراة المحامي..
اه..اشنو كيفاش..
طلعي لداركم دابا..من بعد نفسر ليك..يلاه اش كاتسناي..
واخا..
مسحي عينيك مانشوفكش تبكي مرة اخرى..
المحامي دوا معايا..نكول ليكم هاديك الميريكان ولات خايبة يالطيف كيفركعو فيها الطيارات وكيقتلو الناس عنداكم تمشيوليها واللي جارهم شي محامي راه حسن ليها من شي ميريكان ههههههههه......
الاشتراك في:
تعليقات الرسالة (Atom)
ليست هناك تعليقات:
إرسال تعليق